Dia 7 di october ultimo Conseho di Ministro di Reino (CMR) a nombra e ministro plenipotenciario actual Alfonso Boekhoudt como e siguiente Gobernador di Aruba. For di e silencio den media cu a sigui despues na Aruba por a destila cu gobierno na tawata ‘encanta’. Siguientemente el a expresa su rabia den su carta fecha 12 di october den cual gobierno ta termina su confiansa den su ministro plenipotenciario y ta kit’e for di su funcshon entrante 1 di november. Segun gobierno di Aruba e nombrashon ta ‘completamente en pugna di e reglanan cu CMR a stipula’. Gobierno ta sali for di punto di bista cu e nombrashon aki ta ilegal ‘pasobra gobierno no a propone Boekhoudt manera e procedura (cu no a legalisa formalmente) den Reino ta stipula pa nombrashon di gobernador’.

Pa di prome biaha CMR no a tene cuenta cu e lista di deseo di gobierno di Aruba. Sí gobierno di Hulanda a indica ateriormente cu e tres candidatonan cu gobierno di Aruba a postula, pa varios motibo no tawata aceptabel. Pesey (segun fuente bon informa) a pidi pa otro candidato. Gobierno di Aruba no a cumpli cu e petishon aki, posiblemente basa riba e pensamento cu laat of tempran Hulanda lo guli e deseo/exigenica di Aruba, manera casi semper tawata e custumber. Sinembargo, pa di dos biaha den un tempo cortico gobierno di Aruba a kiboca den e firmesa di Hulanda pa no sigui acepta echamento di baina.

Den e ultimo conflicto aki gobierno di Aruba ta mustra riba violashon di parti di Hulanda di palabrashon pa cu e procedura cu mester sigui pa nombra gobernador. En principio en berdad palabrashon ta mara partido segun e principio di ley ‘pacta sunt servanda’. E partidonan envolvi mester cumpli cu tur palabrashon a base di buena fe. Sinembargo, desde Status Aparte, Aruba, den su relashon cu Hulanda, a eleva incumplimento di palabrashon na e nivel di arte. Un di esnan mas conoci tawata Protocol 1993, cu tawata encera entre otro introducshon di Ley di Financiamento di partido politico, mehorashon di e administrashon financiero y otro asunto importante pa (comunidad di) Aruba. Mayoria di e palabrashonnan ey tawatin como meta mehorashon di e calidad di gobernashon na Aruba. Hulanda a purba di logra bon gobernashon na Aruba pa medio di dialogo politico y palabrashonnan cla pa asina kibra e spiral financiero-economico negativo. Sinembargo, su intentonan tawata en vano.

Pero na Aruba mes gobierno na gran escala (t)a viola regularmente e principio di ‘pacta sunt servanda’, hunto cu norma y stipulashon di ley. Tanten cu gobierno di Aruba mes ta peca na un manera sistematico contra e principionan basico aki, e ta carece e autoridad moral di exigi di otro pa NAN sí tene nan mes estrictamente na e principionan. Si gobierno di Aruba kier haya derecho di papia riba e tereno aki, e mester cuminsa cumpli cu e lista largo di palabrashon-no-cumpli, tanto cu Hulanda como cu su partnernan local.

Pero, hopi mas importante cu e pregunta si a cumpli cabalmente cu e proceduranan, ta e pregunta si e (futuro) gobernador ta capas pa hiba un rumbo neutral na un manera firme den e neishi di maribomba politico di Aruba. E peliger ta hopi grandi cu un candidato cu simpatia partidista no ta cumpli e funcshon di gobernador adecuadamente. Posiblemente esey, ademas di e edad avansa di e candidato principal di gobierno, a hunga un rol den e considerashon di Hulanda pa rechasa e proposishon di gobierno.

Esey ta pone na cla cu e interesnan di Aruba y Hulanda den e asunto aki ta completamente contrario. Mientras cu gobierno di Aruba ta anhela un gobernador ‘for di propio seno’ cu ta goza di e confiansa di e partido, Hulanda ta prefera un funcionario cu ta salbaguardia e interesnan di Reino (incluso di Aruba) na un manera neutral y profesional. Pa comunidad di Aruba no por ta un escogencia dificil cua interes ta prevalece y consecuentemente cua candidato ta mas apto pa logra esey.