Na 2008, mundo a confronta un crisis financiero serio. Empresa financiero grandi na Merca a haci ganashi extraordinario, pero nan a logra esey cu ‘aumento di balor na un manera creativo’ di hipoteca riesgoso y un comercio ilimita di seguro di anulacion. Esaki por a tuma luga dor di e falta completo di supervision efetivo di parti di e instancianan designa pa haci tal. Hasta e empresanan grandi di accountant no a controla e bukinan di contabilidad di e banconan debidamente. Nan no a ripara cu banco tawata comete fraude pa asina aparenta cu nan tawata den un posicion financiero solido. Como cu esaki a tuma luga riba un escala asina grandi, mundo henter a paga un prijs hopi halto.

Na 2014, no tawata banco, sino varios pais Europeo, China, Brazil y otro cu a confronta un crisis financiero. Aki tambe e motibo principal tawata un contabilidad y dunamento di cuenta deficiente. Como cu e efectonan pa comunidad ta asina serio, ta importante pa mira con contabilidad ta funciona y pakico esaki no solamente ta hiba na problema financiero, sino tambe na problema politico si no trat’e cu cuidou.

Den un bon sistema di contabilidad e balor di propiedad ta den balance cu esun di obligacion. Asina empresa y gobierno por controla fluctuacion y alabes minimalisa e posibilidadnan di malversacion. Ademas e ta duna nan un instrumento pa nan planificacion financiero, e maneho en general y e hustificacion, esta di duna cuenta. Entre contabilidad y hustificacion ta existi un balance delica. Hopi biaha esaki ta determina e destino di e empresa of di e pais.

Pesey tambe un bon contabilidad of, mas ainda, un bon administracion financiero ta e base di un pais prospero. Esaki ta genera confiansa den un gobierno estable y un comunidad dinamico. E ta aporta tambe na un cuadro moral y cultural sano cu ta haci cu hende no ta haci un custumber di neglicia, falsifica of ignora un contabilidad drechi. Di otro banda, si ta trata di un contabilidad deficiente, esey ta contribui na atraso y subdesaroyo di e pais, caos financiero, criminalidad economico y inkietud den comunidad.

Un administracion financiero drechi ta e base di legitimidad di accion politico. Balance presupuestal no solamente ta nifica cu e contabilidad ta funciona debidamente, pero tambe cu ta trata di un gobernacion drechi. Den esey, dunamento di cuenta ta hunga un papel determinante. Tanten cu gobernante ta pretende cu nan mester duna cuenta solamente na Dios pero no na controlador financiero, crisis financiero lo keda surgi. En general simplemente no ta reeligi politico cu ta ocasiona esakinan. Pero pa ciudadano esaki tin como consecuencia cu ta reduci nan prosperidad of hasta cu nan ta perde cas y otro propiedad.

Pa hopi gobernante ta problematico pa hiba un administracion financiero transparente. Mas bien nan ta haci uzo di ‘contabilidad creativo’, combina cu un falta di transparencia. Asina, hunto cu e drispidimento cu esaki ta ocasiona, nan ta hiba e pais caminda pa bancarota. Den esaki nan ta neglisia tambe e confrontacion cu realidad si esaki ta malo. Pa e pais mes, esaki ta resulta desastroso.

Un administracion financiero drechi ta un aspecto importante di bon gobernacion. Sinembargo, no ta trata solamente di un norma. E reto ta pa ehecuta e norma ey concretamente. Esey ta rekeri un esfuerso continuo. E ta rekeri tambe pa desaroya e cuadronan moral y cultural necesario: den un cultura unda corupcion ta e norma, un administracion financiero drechi no lo ta factibel. Di otro banda ta conta mescos cu na unda e administracion financiero ta deficiente, corupcion lo haya man liber y lo ta determinante pa e calidad general di gobernacion.

Si lesa raport di Conseho Consultativo, Conseho SocioEconomico, Controlaria General, Banco Central, Fondo Monetario Internacional y otro instancia y comision (incidental) oficial, ta sali na cla cu durante decada gobernante na Aruba a fabrica presupuesto irealistico y/of deficiente. Alabes nan a preveni cu a hiba un administracion drechi di finansas publico di Aruba y nan a obstaculisa transparencia y e ehecucion di un control adecua di su administracion financiero. Asina nan a crea e posibilidad di uza fondo publico na un manera ‘menos legitimo’ sin cu gay a canta. Esey a resulta di ta desastroso pa salud financiero di nos pais Aruba.