Pa motibo di e patronchi di gasto excesivo y continuo di gobierno di MEP y su aparente fayo pa sanea, tawata inevitabel pa introduci BBO riba termino corto pa salba finansas publico. Mas posponemento lo tin como consecuencia cu lo mester fia placa atrobe riba gran escala. Sinembargo, debe di gobierno no por a sigui subi mas. E tempo ey ya caba e tawata 46% di GDP, pues mucho halto pa un isla chikito manera Aruba. Pa AVP introducshon di BBO cumulativo di 3% tawata un oportunidad unico pa probecha di emoshon di e electorado rubiano. Pesey tambe el a haci di eliminashon di BBO e tema principal di su campaña pa elecshon di 2009.
Un di e prome hazañanan di e gobierno nobo di AVP na fin di 2009 tawata abolishon di BBO. Como cu tanto experto financiero independiente y di e propio partido a califica e hugada politico aki como uno no-responsabel, mando di partido a dicidi di elimina BBO den fase. Nunca a ehecuta e di dos fase di 1,5% como cu e falta di entrada di e prome 1,5% ya caba tawatin un efecto financiero negativo grandi pa gobierno. Ademas e patronchi di gasto di e gobierno nobo tawata asina halto cu e tawatin mester di e ultimo dibchi disponibel. Riba dje e efecto di e prome rebaho di 1,5% tawata asina minimal cu practicamente no tawatin ningun efecto pa forsa di compra di ciudadano, locual tawata e meta principal. Pues a cumpli pa mitar cu e promesa principal di campaña. Pero tampoco a cumpli cu resultado cardinal di congreso di AVP tocante BBO, esta pa elimina su caracter cumulativo.
A pesar cu MEP practicamente a opera cu caha bashi durante e ultimo añanan di su gobernashon, a parce cu durante e gobernashon nobo di AVP no tawatin ningun escases di placa. A drecha edificio di gobierno y scol a fondo, a entama campaña berde costoso, famia den problema a ricibi un aporte financiero adishonal, a pinta cas di bario extensivamente y caya principal a haya dos tram. Tur e añanan a publica diariamente tur e actividadnan aki ampliamente den casi tur medio di comunicashon. Pues tawata logico cu despues di cuater aña di gobernashon, AVP a haya e mandato cla pa sigui su trabou, a pesar di e prome señalnan di malestar financiero.
Di biaha despues di elecshon a bira hopi cla cu e gobierno aki tambe ta completamente bashi. Anke e ta haci tur esfuerso pa sconde e realidad, poco poco e berdad ta bira obvio. Awor ta resulta cu gobierno di AVP a realisa un prestashon unico dor di acumula den apenas 5 aña un debe similar cu tur e gobiernonan anterior hunto den 24 aña. Cada bes mas ta sali na cla cu gobierno a show cu placa di pueblo na gran escala sin informa comunidad adecuadamente of asta malamente. Calculashon di Cft ta mustra cu e fayo den finansas na 2014 ta casi dos biaha mas halto cu locual gobierno a indica. Esta mas di Af. 440 miyon en bes di casi Af. 235 miyon. Consecuentemente e debe nashonal ta aumenta te Af. 3.8 biyon (80% di GDP!) en bes di Af. 2,2 biyon na 2009. Solamente na interes ta paga anualmente Af. 190 miyon, o sea Af. 500.000,- pa dia.
Pa un pais chikito manera Aruba esaki ta un situashon insostenibel. No ta por nada cu di biaha despues di elecshon gobierno a cuminsa reduci algun di su gastonan. E promernan afecta tawata e fundashonnan responsabel pa esnan mas debil den comunidad. Mucha chikito, anciano, drogadicto y animal a paga e cuenta. Ademas ta haci uzo cu hopi cariño di e mesun BBO cu antes a desgaba tanto pa genera entrada adishonal pa yuda drecha situashon financiero problematico di AZV. Mientrastanto ta pensa tambe pa introduci un impuesto riba tur transacshon financiero. Sinembargo, e economisashon y entradanan (impuesto) adishonal, necesario pa baha e fayo presupuestal den un futuro na un nivel aceptabel, ta di tal indole cu no ta resta nada di locual a priminti pueblo tocante mehorashon di calidad di bida.
Di e manera aki AVP ta demostra cu e palabranan bunita durante su campaña no tin otro meta cu tuma pueblo haci pa alarga nan gobernashon. Asina e consecuencianan di maneho (financiero) di su prome periodo di gobernashon no solamente ta nifica practicamente bancarota di nos isla, pero tambe di confiansa den AVP en special y politica en general.