Ami semper tin problema cu hende cu ta defrauda otro y despues ta actua como si fuera nan tin solamente bon intenshon. Simplemente nan ta kere cu otro no ta compronde kico ta tuma luga tras di cortina? Of ta djis un cuestion di falta completo di sentido di berguensa?

Tuma e partidonan politico cu ta(wata) na mando na Aruba. Tur a yuda eleva patronahe politico na nivel di arte. Ya caba e surplus di personal ta costa e pagadornan di impuesto mas o menos Afl. 200 miyon pa aña.

Mescos ta conta pa e administrashon financiero cu a hiba. Tur aña suma cuantioso (t)a bay perdi pa motibo di ineficiencia y fraude. Ademas e sistema di impuesto anticua y complica ta laga espacio pa evasion di impuesto riba escala grandi. Den caso di mehorashon lo tin Afl. 100 miyon na entrada adishonal di impuesto.

Y laga nos no lubida e perdidanan gigantesco cu Aruba a sufri pa motibo di proyecto sospechoso y/of cu a faya. E promedio ta mas di Afl. 30 miyon pa aña durante 31 aña.

Pero tin mas gasto pa motibo di mal gobernashon na Aruba. Fayo presupuestal, hopi biaha como consecuencia di e gastonan enorme di e personal di gobierno y otro fayonan, a tapa structuralmente cu prestamo. Awendia e prestamonan ey ta costa nos Afl. 215 miyon na interes. Por atribui minimo Afl. 120 miyon na prestamo, como consecuencia di mal gobernashon.

Si conta tur suma hunto, ta resulta e suma increible di Afl. 450 miyon pa aña. Exclusivamente pa cubri e consecuencianan di mal gobernashon. Esey ta 1/3 parti di e presupuesto total di Afl. 1.350 miyon. Tene na cuenta cu ta sin conta e daño economico

Pero esey no ta e unico problema. Pa facilita e ‘maneho’aki, e gobiernonan consecutivo a ‘elimina’ henter e sistema di checks & balances. Nan a logra esey dor di neglisha structuralmente e instancianan di conseho y control manera Conseho Consultativo, Servicio Central di Accountant, Controlaria General, Conseho Social-economico, Banco Central, Fondo Monetario Internashonal, Comishon Financiero, Comishon Nashonal pa Finansas Publico, Comishon di Lennep, etc. Den esey, Parlamento a duna su coperashon n’esaki. Riba dje a obstaculisa e trabou di control di Servicio Central di Accountant y Controlaria General dor di limitashon riba personal y fondo.

Analisis di tur raport di e instancianan menshona ta trece na cla cu den tur esey continuamente sa viola Constitushon y otro ley. Cu sa entrega presupuesto irealista na un manera sistematico (engaño!). Cu Parlamento semper sa legalisa tur esaki di manera retroactivo. Cu structuralmente sa neglisha advertencia serio di e instancianan oficial pa cu e maneho financiero-economico y social. Cu semper sa descuida e consecuencianan di maneho fatal, manera tawata e caso pa cu SVB y AZV. Tambe sa hala recomendashon importante pa mehorashon di e calidad di gobernashon un banda. Esaki ta indica cu concientemente a scohe pa mal gobernashon. Ademas (tawa)tin un falta structural di transparencia y na dunamento di cuenta di e maneho cu a hiba. Manipulashon di informashon y intimidashon (cultura di miedo) te ainda ta na ordu di dia. Tur esaki ta mustra bon cla cu tin un indiferencia grandi pa cu bienestar di e comunidad di Aruba, locual tin consecuencia financiero y socio-economico hopi grandi. Esaki ta bay linea recta contra e promesa di e mandatarionan na comienso di nan aceptashon di nan funcshon nobo.

Con tur esaki ta(wata) posibel? En realidad tur esaki ta consecuencia di falta di integridad di e mandatarionan politico. Esaki ta sali na cla for di e modus operandi den e proyectonan sospechoso y/of cu a faya. Riba dje e raport Koerten di Servicio di Seguridad di Aruba y e rapport di Tom Blickman (The Rothschilds of the Mafia on Aruba) na fin di añanan ’90 ta mustra riba e lazonan entre politico y maffia. Si considera tur cos hunto, ta parse cu a hiba un maneho cu ta parecido na esun di organisashon criminal. E desaroyonan reciente cu detenshon di un ministro pa motibo di corupshon (?) ta duna e impreshon cu e situashon no a cambia mucho den e ultimo añanan. E pregunta ta: con pa sigui awor?

Den esaki, Raport Calidad ta papia idioma cla. E raport ta expresa un desconfiansa grandi pa cu politica pa realisa cambio positivo. Pesey tambe e ta haci un apelashon fuerte riba ciudadano pa nan mes vigila y, si ta necesario, enforsa gobierno pa hiba un maneho segun e criterianan di bon gobernashon. Esey ta exigi

di ciudadano cu nan semper mantene un actitud critico. Como cu esakinan mester actua contra agrupashon organisa manera partido politico y gobierno, nan tambe mester organisa nan mes. Pa logra esey, formashon di movimiento civil ta e caminda indica.

Pa Aruba, esaki ta e principal alternativa. E ta rekeri un cambio di mentalidad, tanto di parti di (mayoria di) pueblo, como di e mundo politico. Cambio di mentalidad semper ta un asunto di un aliento largo. Pero una bes cu tin un comienso, ta dificil pa para e tren. Ta di spera cu e reciente simposio pa bon gobernashon a pone e prome paso den e bon direcshon.