Ademas Statuut ta fiha den articulo 43 cu e paisnan autonomo mes ta responsabel pa ‘cumpli cu e derecho- y libertadnan humano, cu siguridad legal y cu calidad di gobernashon’. Pues, desde realisashon di Statuut, esaki a bira un prome y propio responsabilidad di gobernashon. Ademas, Statuut ta bisa den articulo 43 cu ‘e garantia di e derecho- y libertadnan, siguridad legal y calidad di gobernashon aki ta asunto di Reino’. Consecuentemente esey kier men cu Reino por tuma medida si e paisnan autonomo mes no ta percura adecuadamente p’esaki.
Sinembargo, den e cuadro di Reino no a explicita e tres terenonan aki ni e reglanan al respecto. Consecuentemente cada un pais por duna su propio splicashon y contenido. Tampoco a regla mantenshon ni supervishon di e asuntonan aki cu excepshon di intervenshon di Hulanda. Pero ta posibel si pa imagina kico e terenonan aki ta representa.
E habitantenan di Reino, doño di nashonalidad Hulandes, tin derecho riba protecshon y estimulo di gobierno pa cu desaroyo di nan derechonan humano y cierto norma minimo. E balornan comun aki ta forma e base di Reino y mester conta igual pa tur parti den Reino.
Si nos duna mas contenido na e balornan y haci palabrashon na unda ta tuma e terenonan menshona den articulo 43 como punta di salida (locual nos por haya tambe den Constitushon di Hulanda y e islanan Caribense) por pensa riba lo siguiente. Den esey Constitushon di Hulanda, Constitushon di e islanan den Caribe, acuerdo internashonal, manifiesto di organisashon internashonal ta fungi como fuente di inspirashon. Den cuadro di e articulo aki nos ta limita nos mes na e punto di atenshon special di Fundashon Gobernashon di Calidad Aruba, esta e tereno di ‘calidad di gobernashon’.
Calidad di gobernashon tin lazo hopi estrecho cu siguridad legal. Ciudadano mester por conta cu un gobernashon independiente, confiabel y integro. Gobierno mester trata e fuentenan humano y material di gobierno na un manera integro y responsabel y e mester hiba un maneho financiero structuralmente duradero. Mester asegura e organisashon democratico di e paisnan di Reino. Tambe por pensa na: e derecho pa tur hende pa participa na tratamiento di asunto publico; vota; keda elegi y permiti pa servicio di gobierno.
Un maneho anti-coruptivo tambe ta esencial pa calidad di gobernashon. Por pensa di medida pa preveni y combati corupshon. Esaki ta encera tambe promoshon di integridad, honestidad, responsabilisashon y bon gobernashon. Esey ta conta pa tur hende cu ta hunga un rol den e gobernashon publico di pais, tanto empleado publico, gobernante como politico. Ademas e ta encera un codigo di comportashon pa funcshonario publico; regla tocante proyecto di gobierno y administrashon financiero; medida pa preveni labamento di placa; penalisashon di cumpramento di empleado publico y di malversashon; uzo ilegal of otro tipo di abuso di material di parti di un empleado publico; regla pa preveni influencia no-permisibel; abuso di funcshon y enrekicimiento ilegal.
Den e cuadro aki ta rermarcabel cu di tur acuerdo cu ta conta pa henter Reino, e siguiente acuerdo no ta conta pa tur pais den Reino: e acuerdo di Naciones Uni contra corupshon (UNCAC). Lo ta bon si e acuerdo aki tambe lo conta pa tur pais di Reino, como cu internashonalmente ta considera esaki hopi fundamental.
Instituto di Reino
Dentro di Reino ta falta un mecaniso independiente pa supervisa ehecushon y cumplimento. Apenas tin un control mutuo limita; e paisnan autonomo no ta ‘cuida’ otro debidamente. Pues ta parce logico cu lo institui un mecanismo di Reino conhunto y independiente cu participashon di tur cuater pais, cu ta controla cumplimento di e normanan minimo mas otro palabrashon. E mecanismo aki por monitoria e recomendashonnan cu ta sali for di e raportahenan (tocante derecho humano) cu ta obligatorio pa Nacionnan Uni.
Un secretariado di Reino mester asisti e Instituto di Reino aki cu por yuda na identifica e mecanismonan di cooperashon. Posiblemente por elabora e idea aki mas amplio, di tal forma cu no ta lanta solamente un secretariado, sino tambe un mediador di Reino y/of un mecanismo pa soluciona conflicto.