Durante decada, partido politico cu alternativamente (t)a forma gobierno, a purba di empaketa e resultadonan di nan maneho lo mas atractivo posibel. Votador realmente mester a haya e impreshon cu nan escogencia pa e partido (den gobierno) tawata esun miho. Pesey tambe a mustra cu orguyo, asta durante e tantisimo momentonan cu gobierno tawata casi hoga financieramente, riba e hayazgonan di e raportnan di Fondo Monetario Interashonal (FMI). Regularmente esakinan tawata mustra riba e bon prestashonnan di economia di Aruba. Pero na mesun momento a laga di menshona e advertencianan serio pa cu e situashon financiero y e causanan for di e mesun raportnan. Esakinan lo tin consecuencia electoral negativo pa e partidonan envolvi. Pesey a neglisha nan.

E mesun tactica aki ta uza tambe den e campaña actual. Gobierno, hunto cu parlamentario fiel, ta bati su mes continuamente riba su pecho cu el a realisa un milager economico cu a salba Aruba for di un situashon di crisis. Pa demostra e ‘milager’ey, e ta haci uzo di un grafica cu mester demostra e resurecshon di Aruba como resultado di e maneho di gobierno di e ultimo 7 añanan.

Den esey e ta ‘lubida’ (concientemente?) cu e ‘milager’ ey ta limita severamente e posibilidadnan financiero di cada siguiente gobierno durante e decadanan benidero mescos cu e perspectivanan economico di Aruba pa motibo di e aumento serio di e obligashonnan di pago di debe y interes. Ta asina cu e cantidad enorme di placa cu gabinete Mike Eman-1 a gasta den apenas 3,5 aña a redobla e debe di (2) biyones cu a acumula durante e 23 añanan anterior. Dentro di dos aña e situashon aki lo empeora seriamente pa motibo di e debenan adishonal di mas o menos Afl. 1 biyon pa motibo di e proyectonan PPP. Pero…AVP no ta etala e grafica ey, ni tampoco e graficanan cu ta demostra e reducshon considerabel di e aporte di gobierno pa fundashon, ni tampoco di e grafica cu ta mustra e aumento di e obligashonnan di interes cu actualmente ta suma na Afl. 230 pa aña. Esey ta mas cu henter e presupuesto di ministerio di Salubridad, esun di Husticia y casi mes hopi cu esun di Enseñansa.

Asina mes mester considera e grafica di AVP cu cierto desconfiansa. Pasobra e grafica aki ta presenta solamente e crecemento economico procentual durante di su gobernashon, compara cu esun di e ultimo gobernashon di MEP. Den esey no ta pone atenshon na nivel di e GDP cu ta di mas importancia pa midi prosperidad di un pais. Manera por aprecia den e siguiente tabel cu cifra di Banco Central di Aruba, nunca a supera ni e GDP real ni esun nominal di 2008 den e añanan despues.

X Afl. milj. 2007 2008 2009 2010 2011 2012 2013 2014 2015 2016* 2017**
BBP nom 4681 4914 4473 4279 4564 4537 4621 4743 4836 4774 4876
BBP reëel 3615 3620 3210 3102 3212 3168 3301 3329 3332 3312 3331

* Cifra preliminar di 2016
** Proyecshon pa 2017

E BBP real ta e balor di mercancia y servicio a base di prijs constante (dor di tuma prijs di un aña di referencia). Pues no ta tene cuenta cu e consecuencianan di inflashon.

E BBP nominal ta e balor di producshon di un pais durante un aña, na balor di prijs di e aña ey. E suma ey ta depende di e cantidadnan y di prijs di locual a produci..

Ta mas importante ainda pa presenta e desaroyo di GDP pa persona. Asina ta bira cla si ta trata di un aumento of reducshon di productividad.

Pero ta di vital importancia pa mustra e (desaroyo di e) DEBE actual y futuro pa persona, ademas di e posibel consecuencianan pa ciudadano. Siguientemente mester compara nan cu situashon similar den nos regio, manera Puerto Rico. AVP lo presenta comunidad Arubano un imagen mas realistico, exponiendo e informashon aki tambe den grafica cla, hunto cu e medidanan concreto cu e ta pensa di tuma pa logra finansas publico duradero. Solamente asina por determina e futuro prosperidad di ciudadano Rubiano, cu nos partidonan politico aparentemente ta ansioso pa mehora.