Hopi aña pasa ami –cu otro socio- tawata traha intensivamente pa realisashon di caminda pa bicicleta. Pa logra e meta aki nos a lanta e fundashon FACABI (Fundashon Arubano Caminda pa Bicicleta). Departamento di Obra Publico (DOW) a duna su asistencia cu e diseño tecnico pa e camindanan. Di varios instancia e proyecto a haya promesa di sosten financiero. Asina mes mi a para mi esfuersonan di un momeno pa otro pa e proyecto ‘Caminda di Bicicleta na Aruba’. Esaki tawatin dos motibo.

Como cu tawata trata di un invershon hopi halto, a consulta cu Hulanda si e tawata dispuesto pa aporta financieramente na e proyecto. Sinembargo, e representante di Hulanda di e tempo ey a plantea cu tawata trata di un proyecto relativamente barata cu Aruba facilmente por financia cu su propio medionan. Si Hulanda lo dicidi pa yuda financia e proyecto, e ora ey Aruba lo por sigui sin strobashon cu su mal maneho riba tereno di personal y finansas cu e placa cu e lo a scapa di inverti den e proyecto. Hulanda no kier a colabora cu esaki. Pa Hulanda, specialmente e gran cantidad di nombrashon politico tawata un iritashon grandi. Mi tawata completamente di acuerdo.

Den e mesun periode mi tawatin un combersashon cu un funcionario halto di gobierno di Aruba. El a puntra con a para cu e desaroyonan en cuanto realisashon di e proyecto. Mi a pon’e na haltura di e situashon tecnico y financiero na e momento ey. Na su turno el a puntra’mi ‘si nos ta tene cuenta cu placa pa ministro’. Riba mi pregunta pa mas splicashon el a contesta ‘cu ministro lo pone su firma solamente bou di e proyecto si e lo ricibi placa p’e’. Bou di ningun circumstancia mi tawata dispuesto pa aporta na propio-enrikecimento di un ministro. Mi a duna di conoce cu aki ta trata di un proyecto cu tawata bon pa henter comunidad y cu ami mes no lo tin ningun tipo di beneficio financiero cu e proyecto. Su contesta tawata cu esaki no lo ta ningun prioridad pa ministro ora di firma. Pa mi esey por lo pronto a pone fin na mi actividadnan pa cu e proyecto di caminda pa bicicleta.

Desde e momento ey m’a cuminsa cu mi ‘lucha’ contra mal gobernashon. Mi a expresa mi critica entre otro pa medio di publicashon di e buki ‘Bon gobernashon y e realidad politico’ na 2001, 15 aña despues di inicio di Status Aparte. Analisis for di inumerabel raport di Controlaria General, Conseho Socio Economico, Banco Central, ademas di documento for di Servicio Central di Accountant y Conseho di Consulta a resulta den e ponencia cu ministro y gobierno na Aruba ta neglisha sistematicamente e principionan di bon gobernashon, manera conseha den Raport Calidad cu poco prome a keda publica y a keda ricibi cu hopi entusiasmo pa e mundo politico. E negligencia aki tawata tuma luga na un escala asina extenso cu no por tawata trata di ‘eror’ sino di ‘intencion premedita’. E cantidad di violashon di e principionan di bon gobernashon y di stipulashon legal pa gobernante di ningun manera tawata sirbi e interes general.

Na ocashon di 25 aña Status Aparte na 2011 mi a publica e buki  ’25 jaar Status Aparte, een politiek paradijs’. E buki aki ta denuncia e manera con a practica politica na Aruba durante 25 aña. E ta describi e relashon entre actitud politico, of hustamente e falta di actuashon, y e consecuencianan pa comunidad. Intenshon di ambos buki tawata pa aporta na e proceso di concientisashon di comunidad. Despues mi a publica regularmente articulo den corant rubiano desde juli 2014 te cu april 2015 cu comentario tocante funcshonamento di gobierno. Al fin y al cabo mi a para cu esey pasobra ya caba a bisa ‘tur cos’, consecuentemente mi tawata ripiti mucho hopi, politica no a cambia di ningun manera y pues a sigui su modus operandi. Sigui publica pa concientisa a resulta di no ta fructifero. A bira tempo pa refleha y pa inventa un otro acercamento, preferiblemente uno mas efectivo.

Hunto cu mi coleganan miembro di directiva Leo Maduro y Servito Thijsen nos a dicidi pa traha na un manera mas activo na realisashon di bon gobernashon como nos aporte na 30 aña di Status Aparte. Pesey nos a lanta Fundashon Gobernashon di Calidad Aruba. E meta y instrumentonan ta describi den e statutonan bou di ‘Gobernashon di Calidad’ Nos ta spera cu nos por conta tambe riba Abo tambe pa realisa gobernashon di calidad na Aruba. Al fin y al cabo e calidad di gobernashon ta un responsabilidad di nos tur.

N.B. E palabranan diki/blou ta link na e tema menciona → Mester klik riba nan!