Na prome luga FGCA ta traha na expanshon di conocemento tocante su meta y instrumentonan den comunidad di Aruba. Pa logra esey lo publica cada bes mas articulo informativo, ademas di entrevista na radio y TV. Asina lo ehecuta e instrumentonan A y B, menshona bou di ‘Tocante e fundashon’.

Ademas lo tin encuentro cu agrupashon comunitario, organisashon sindical y comercial, partido politico y gobierno pa enfatisa e importancia di ehecushon di e recomendashonnan di raport Calidad como prome paso pa gobernashon di calidad y nan responsabilidad pa aporta na realisashon di bon gobernashon (mira C).

FGCA ta enfoca riba e violashonnan principal di gobernashon di calidad y lo haci esey pa medio di raport investigativo, cu mas bien ta inventarisashon di varios raport cu a publica antes y cu a desparce pa un gran parti den latjie di gobierno. Durante 2016 lo trata e temanan ‘Maneho di Personal, Maneho Financiero y Transparencia. Na 2017 lo pone atenshon sucesivamente na Funcshonamento di Parlamento, Maneho Economico y Integridad.

For di analisis anterior ya caba a resulta cu riba e terenonan aki ta(wata) trata di mal gobernashon/funcshonamento. A base di e raportnan investigativo lo purba, den dialogo cu e stakeholdernan, na elimina e puntonan problematico y pa hisa e calidad di gobernashon riba e terenonan menshona na un nivel mas halto (D).

FGCA ta aspira pa logra gobernashon di calidad pa medio di dialogo habri y honesto cu tur stakeholder na beneficio di interes general. Si resulta cu gobierno ta nenga su coperashon of ta obstaculisa desaroyo positivo, FGCA lo purba di logra su meta pa medio di caso hudicial, haciendo uzo di punto 2 di articulo 3 di Ley di Ordenansa Administrativo: ‘en cuanto persona huridico lo considera como nan interes e interes general y colectivo cu nan ta defende specificamente a base di nan metanan y segun nan actividadnan concreto’ (E).

E desaroyo di medio di comunicashon inovativo y e interes creciente di ciudadano den henter mundo (occidental/moderno) pa e.o. gobernashon di calidad ta haci cu preshon internashonal lo por logra locual intento nashonal no por a alcansa. E presentashon di e conclushonnan mas importante di FGCA na e.o. Ingles y Spaño por aporta na un conocemento internacional creciente di e intentonan di FGCA y e eventual disposishon di gobierno di Aruba pa realisa e intentonan ey (F).

E exito di Aruba no ta depende solamente di un gobernashon di calidad, pero tambe di un vishon cla pa cu su futuro. Pesey, FGCA ta haci uzo di vishon cu a desaroya e ultimo decadanan pa instancia local y comunidad y cu por sirbi como guia. Por lesa varios di nan bou di ‘Vishon y documento di maneho’ riba e Homepage (G).