Gobernante por uza nan competencianan solamente pa e meta cu ta prescribi pa ley (détournement de pouvoir). Ademas nan por tuma solamente decishon riba e terenonan pa locual nan tin autorisashon of competencia segun entre otro Ley di Comptabilidad. Na momento cu nan ta viola e regla aki, en realidad nan decishon no tin balor legal. Asta por responsabilisa e gobernante personalmente.
Pakico uzo ilegitimo di competencia (abuso di ley) no ta aceptabel?
Abuso di competencia (ley) ta encera cu ta uza e competencia (ley) na un manera cu no tawata e intenshon. Specialmente si gobernante ta practica esaki, e ta causo inseguridad tocante balor di ley.
Cada gobernante ta responsabel pa locual ta pasa riba su tereno di maneho. Sinembargo, na momento cu e ta mete riba e tereno di maneho di otro colega sin autorisashon, e posibilidad di conflicto di interes ta grandi.