Dia 26 di februari 2016 a constitui e Fundashon Gobernashon di Calidad Aruba pa medio di un acta notarial. Poco despues a inscribi’e den Camara di Comercio. E fundashon tin como meta:
(promoshon di) bon gobernashon den e sentido mas ampio di e palabra di y den e estado di derecho democratico riba escala chikito cu Aruba ta, ademas tur locual tin di ber cu esaki directa- of indirectamente.
E ta purba logra e meta aki pa medio di entre otro:
A. duna informashon general tocante calidad di gobernashon, segun e principionan manera expone entre otro den raport Calidad;
B. duna informashon general di e necesidad pa ambiciona gobernashon di calidad , siendo un condishon pa un Aruba sostenibel;
C. stimula comunidad pa asumi responsabilidad pa controla si ta goberna segun e principionan di bon gobernashon;
D. expone caso concreto di mal gobernashon y aspira na mehorashon pa medio di dialogo cu tur stakeholder;
E. realisa mehorashon concreto riba tereno di gobernashon na beneficio di interes general, si ta necesario pa medio di caso hudicial;
F. busca coperashon cu otro na Aruba y den exterior pa realisa mehorashon efectivo di e calidad di gobernashon; y
G. duna conseho riba petishon of propio iniciativa pa mehorashon concreto di gobernashon, basa entre otro riba un vishon cla pa desaroyo di Aruba.