Patronahe politico ta e relashon den cual e politico of partido politico ta duna fabor (p.e. un nombrashon den servicio di gobierno, un tereno, un permiso, etc) na un ‘cliente’ en cambio pa su voto den elecshon, otro servicio of lealtad. E sinonimo popular pa patronahe politico ta ‘politica di friends & family’.

Nepotismo, ta un forma di patronahe politico y ta encera cu autoridad ta priviligia propio famia y amigo, p.e. dor di nombra nan den posishon halto of dor di otorga contrato na un manera preferencial.

Pakico patronahe politico no ta aceptabel (y pues nepotismo tampoco)?

E sistema di patronahe tin un influencia hopi malo riba calidad di gobernashon y den cierto sentido tambe riba mentalidad di nos hendenan, como cu nan no ta mira e relashon mas entre propio esfuerso y desaroyo personal.

Nepotismo ta forma un violashon serio di e ley basico principal (esta articulo 1.1 di Constitushon) di Aruba). Pasobra e ley ey ta bisa cu “Tur hende na Aruba mester haya un trato igual den caso similar. No ta permiti discriminashon pa motibo di religion, filosofia di bida, preferencia politico, rasa, orientashon sexual, color, idioma, decendencia nashonal of social, pertenencia na un minoria nashonal, fortuna, nacemento of ki otro motibo cu por tin.

Ademas nombrashon politico di amigo amateurista te den funcshon di direcshon ta mina calidad di e aparato gubernamental y e motivashon di ‘colega’.

Pakico patronahe politico ta asina dañino pa nos pais?

En principio e politico of partido politico cu ta adkiri e sosten no sa ‘paga’ nan mes e personanan en cuestion. Pesey nan ta uza e fuentenan financiero y material di e pais (y pues di e –otro- ciudadanonan y e sector comercial cu ta paga impuesto) pa recompensa esnan beneficia. Ta trata di trabou den gobierno, tereno di pais Aruba, otorgamento di permiso of asignashon comercial cu sa tuma lugar fuera di ley existente of stipulashon di prijs normal. E gran cantidad di nombrashon y promoshon politico durante decada (t)a conduci na un perdida enorme di finansas y consecuentemente tambe (ta) tin efecto negativo pa economia.