Fundashon Gobernashon di Calidad Aruba (FGCA) kier duna informashon general tocante calidad di gobernashon segun e principionan manera indica entre otro den Raport Calidad. Esaki ta necesario pasobra ya caba poco despues di inicio di Status Aparte, gobernashon di Aruba no a tuma e principionan di bon gobernashon na serio. Malgobernashon a bira e norma. Esaki a resulta di ta desastroso pa Aruba.

Durante e ultimo decadanan e propio instancianan di conseho y control di Aruba manera SER, Consulta di Conseho, Controlaria General, varios comishon instala oficialmente, ademas di organisashon internashonal di conseho manera oficina di evaluashon (rating) y Fondo Monetario Internashonal a publica un cantidad di raport cu conseho pa Aruba. Mayoria di raport a mustra riba reducshon di e gasto di mas grandi di Aruba, esta e personal di gobierno, ademas di e necesidad pa mehora e maneho financiero. E gobiernonan consecutivo a neglisha practicamente tur conseho sistematicamente. Consecuentemente nos finansas publico na e momento aki (april 2016) ta den un estado deplorabel. Esey tin su efectonan riba tur tereno di maneho. Initiativa di gobierno, otorgamento di subsidio y asta obligashon normal ta tuma luga cu dificultad creciente pa e simpel motibo cu…”no tin placa”.

Mientrastanto e debe nashonal di Aruba a surpasa Afl. 4 biyon y ta practicamente impagabel. E relashon entre debe y nos producto nashonal (GDP) ta mas cu 80%. Incluso e obligashonnan di pago di e proyectonan di PPP e relashon aki dentro di dos aña lo surpasa AFL. 5 biyon. Consecuentemente e relashon entre debe y GDP lo surpasa 100%. No solamente e debenan ta problematico, sino tambe e pagonan di interes di minimo Afl. 200 miyon pa aña ta nifica un peso enorme pa Aruba. Durante hopi aña Aruba a cubri su obligashonnan creciente cu aumento di impuesto. Mientrastanto e medio ey a yega su limite. Forsa di compra di pueblo a keda afecta di tal forma cu esaki tin consecuencia grave pa economia. Pues e pregunta ta surgi ki direcshon mester tuma awor.

Durante e historia cortico di Aruba desde Status Aparte semper a busca solushon pa situashon similar pa problema di e momento ey sin atende cu e causanan. Consecuentemente e problemanan a sigui deteriora. Pesey FGCA ta pone atenshon di comunidad riba e problematicanan principal cu ta stroba un Aruba saludabel y duradero. Pa haci esey, durante e dos añanan benidero ta inventarisa tur informashon riba tereno di Maneho di Personal, Maneho Financiero, Transparencia, Funcshonamento di Parlamento, Maneho Socio-Economico y Integridad. Alabes lo duna sugerencia pa mehorashon. E raportnan investigativo aki lo forma un base pa concientisa nos comunidad di e necesidad pa elimina e problematicanan. Siguientemente lo purba di convence politica, den colaborashon cu e partnernan social y agrupashon comunitario, pa actua riba e diferente terenonan segun e principionan di bon gobernashon.

Ademas e raportnan investigativo lo forma e base pa eventual paso hudicial pa defende interes general contra e interes politico partidista. Considerando e globalisashon creciente y aumento di ciudadano na mundo cu kier aporta na mehorashon di e comunidad mundial, FGCA tin e speransa cu e preshon creciente for di nos propio comunidad y e comunidad internashonal lo haci cu gobernashon lo cambia su ‘modus operandi’ dentro di poco tempo y lo bay mehora su mes cualitativamente na interes di henter nos comunidad arubiano.

 

1. Naar een rationeel personeelsbeleid

1.1 Abstract Rapport Personeelsbeleid

 

2. Rapport Financieel Beheer

2.1 Aandachtspunten Rapport Financieel Beheer Aruba

2.2 Abstract Rapport Financieel beheer