Corupshon ta e fenomeno politico, social of economico na unda un partido den un situashon di poder ta duna fabor no-permisibel en cambio pa otro servicio of como ‘servicio di amigo’.
Un forma hopi uza di corupshon ta conflicto di interes: esta un situashon na unda un persona ta sirbi varios interes cu ta bin den conflicto cu otro. Por ehempel: un ministro cu ta otorga un asignashon na un empresa den cual e tin cierto interes (su señora of amigo ta doño y esakinan ta pasa un parti di e placa cu a gana bek pa e ministro).
Pakico maneho no-integro y/of coruptivo ta asina dañino?
Corupshon ta e simptoma di un situashon economico malo, un mal gobierno of un maneho empresarial malo. E ta perhudica hende pober of honesto y ta faborece criminal. E ta afecta un di e fundeshinan di democracia y orden publico, esta cu tur hende tin mesun derecho. Corupshon ta conduci na privilegio na esun cu ta paga (p.e. cu su voto y/of sosten) y ta abstene privilegio na esun cu no ta paga
Pakico conflicto di interes ta asina dañino?
Frecuentemente ta duna asignashon/destaho na propio empresa of di amigo di manera cu no tin un destaho habri of honesto. Asina otro empresa semper ta sali perdi, e prijs ta sali mas halto mientras cu calidad no ta aumenta. Consecuentemente proyecto ta costa mas pasobra ta stroba e funcionamento di mercado liber. Ademas ta trata di erikecimento propio, tanto di e gobernante como e receptor y pues ta trata di un forma di corupshon.