FGCA ta purba concientisa comunidad di Aruba en cuanto e necesidad pa goberna nos pais segun e principionan di gobernashon di calidad. En efecto gobernashon di calidad ta na interes general. A base di e proceso di concientisashon aki FGCA ta spera di logra cu for di comunidad mes lo sali exigencia mas halto na calidad di gobernashon.
Como base, FGCA ta uza Raport Calidad (skirbi bou di presidencia di mr. Mito Croes) cu a publica na 1997. E raport aki, traha specialmente pa Aruba, no ta describi solamente e principionan mas importante di gobernashon di calidad, pero tambe ta duna 20 recomendashon cu lo mester legalisa como prome paso pa mehorashon. Na aña 2000, e gobierno di AVP di e tempo ey a firma un acuerdo cu varios sindicato (Protocol 2000) den cual el a priminti cu e lo ehecuta e recomendashonnan integralmente. Pa su importancia, tur organisashon di dunador di trabou tambe a firma e protocol aki.
Como cu mas cu 15 aña despues a ehecuta apenas un parti minimal di Protocol 2000, FGCA ta pone su mes como un meta importante pa, den colaborashon cu tur partner social, agrupashon comunitario, partido politico y gobierno, ehecuta e resto di Protocol 2000 lo mas integral posibel, incluso e adaptashonnan cu a tuma luga pa motibo di cambio y ‘punto di bista nobo’, prome cu 1 di januari 2017. Siguientemente lo cumpli cu e yamada di raport Calidad pa sigui traha continuamente na mehorashon di gobernashon.