Gobernashon di calidad ta cumbini nos tur. No solamente nos mes, sino tambe nos yiu- y nietonan. Mescos cu nos a hereda un pais bunita di nos mayornan, mescos nos tin e obligashon pa laga un pais pa nos yiu- y nietonan na unda nan por ta feliz y biba den suficiente prosperidad. Nos no por permiti nos mes pa laga un pais atras na unda no tin suficiente luga pa biba mas y cu ta impone un debe enorme y un infrastructura defecto riba nan.
Un gobernashon cu no ta discrimina a base di preferencia politico, cu tin su administrashon na ordu, cu ta transparente den locual e ta haci y laga di haci y cu ta haci esey pasobra comunidad ta spera esey di dje pero tambe pasobra e mes ta haya esey normal, ta duna algun garantia cu ta reparti e prosperidad na un manera honesto. Lo por tin un gobernashon asina solamente si nos como comunidad ta duna un señal cla cu e gran mayoria ta exigi esey. Pesey tambe FGCA ta haci un apelashon pa duna Bo aporte como individuo of organisashon na e direcshon aki.